حوار صحفي مع المعلقة الصوتية/ أمينة أحمد
س: في البداية، ممكن تعرفينا عن نفسك؟
في البدايه أحب أشكركم جداً علي أستضافتكم ليا
أنا أمينه أحمد
معلقة صوتية قدمت أعمال بسيطة زى حواديت ماما أمينة وبرنامج هي وجواها وبودكاست قاعدة صحاب
أعمال علي أد ما هي بسيطة لاكن شبهي وشبه كتير مننا
بحب أقرأ أرسم ألون تقدري تقولي كدا
بحب كل ما هو بسيط ومعبر
س: هل التعليق الصوتي نقدر ننميه بتدريبات معينة؟ ولا دي موهبة ربانية؟
ج. طبعاً موهبة وأي حاجة عندنا أسسها موهبه ربنا سبحانه وتعالى أنعم علينا بيها
لاكن أي موهبة لو منمنهاش وأدربنا عليها عمرنا ما هنحافظ عليها
وفعلاً التعليق الصوتي محتاج تدريبات
علي مخارج الحروف والنفس والوقفات
والتحكم في المشاعر ونبره الصوت
اللي تخلي اللي يسمع يحس وكأنه عايش اللي بيسمعه
س: امتى حسيتي إنك عندك موهبة الصوت؟
ج. من حوالي سنتين كنت دايما أحب أسمع الإعلانات وأقلدهم
وأسأل نفسي ممكن أكون أنا مكانهم
لدرجة في مرة سجلت إعلان ونزلته علي أستورى الواتس فوجئت بأخويا الكبير بيقولي مين دي 🤭
ولاحظت الانتشار السريع للتعليق الصوتي علي السوشيال ميديا وإن له كورسات عرفت وقتها أن ده فعلا مجالي اللي هلاقي نفسي فيه وبصراحة مترددتش لحظه أني أبدأ
س: ايه هي المزايا اللي حصلتي عليها من موهبتك؟
ج. لاقيت نفسي أكتر في الحاجة اللي شبهي عرفت أعبر عن اللي جوايا بطريقة جميلة حباها
عرفت ناس جديدة في حياتي مرتبطين بنفس المجال أو مجالات مشتركة
التعليق الصوتي كان بالنسبة بداية لطيفة الحمد لله
س: مين اللي شجعك إنك تستمري في موهبتك؟
ج. أكتر حد شجعني حقيقي كان ماما
وتشجيعها المستمر ليا وأبني مصطفي
طول الوقت الله يا ماما تحفة
أنا كمان قدمت حدوتة بأسمه علي الراديو
س: ممكن تقوليلنا موهبة التعليق الصوتي أثرت فيكي ولا لأ؟ وايه مدى تأثيرها على شخصيتك؟
ج. أه طبعا أثرت فيا جداً
عرفتني علي جزء مني مكنتش شيفاه وهو أنى أقدر أعيش المشاعر وأشارك الناس مشاعرهم ببساطة بس من خلال صوتي ودي نعمة كبيرة من ربنا الحمد لله
كمان شخصيتي بقت أهدي أما لاقيت أن اللي بقدمه وفاكره أني لوحدي اللي حساه في ناس تاني شبهي وحاسه نفس إحساسي
س: تحب تقولي ايه لأي حد نفسه يكون عنده الموهبة دي بس بيخاف؟
ج. أحب أقوله متخافش أبداً من التجربة
يمكن تكتشف جواك موهبة مكنتش تعرف عنها حاجة المهم متستسلمش وجرب محدش بيحاول ومبيوصلش
المهم تصدق نفسك وتحاول
س: مين هو قدوتك؟
ج. قدوتي بابا الله يرحمه عمره ما وقف لحظة أو قال مش هعمل بالعكس كان دايما مبادرة دايما يقولي متخافيش
وأكيد لو كان سمع أي حاجه بقدمها دلوقتي كان هيكون فخور بيا جدآ ودي أهم حاجة عندي ربنا يرحمه حبيبي
س: تحبي تقولي ايه للشخص اللي خلاكي تطلعي الموهبة؟
ج. أحب أشكر أي حد ساعدني وشجعني علي أني أشوف نفسي بعين مختلفة
وأحب أشكر كل حد أشتغلت معاه ووثق فيا أني هقدم المطلوب بشكل لطيف
وأحب أشكركم علي تشجيعكم للمواهب اللي زينا
س: وفي النهاية، تحب تقولي ايه لكل اللي بيسمعوكي؟
ج. أقولهم متخافوش محدش يقول مش هقدر كل واحد فينا جواه موهبة وملكة حتي لو مش عارفها
دور جواك وأعرف موهبتك وصدق نفسك عشان الناس تصدقك 🤍
تحرير: أميرة حجازي