إسلام الشربيني شاعر عامية وكاتب مصري، واحد من الأصوات اللي قدرت تثبت وجودها في ساحة شعر العامية المعاصر.، مع الوقت قدر يكون له بصمة خاصة من خلال كلماته اللي قريبة من الناس وحكاياتهم اليومية.
اختار العامية المصرية طريق للتعبير، بأسلوب بسيط وسلس، لكن مليان إحساس وعمق إنساني. قصايده بتحكي عن الوجع والفرح وتجارب بنعدي بيها كل يوم، وعلشان كده بتوصل بسرعة وتلمس قلوب كتير.
من أبرز أعماله ديوان «ما بينا حكايات» وديوان «الوعد»، وبيحرص دايمًا على التواجد الثقافي والمشاركة في الفعاليات الأدبية، وعلى رأسها معرض القاهرة الدولي للكتاب، واللي أعماله بتحظى فيه بإقبال من محبي شعر العامية.
باختصار، إسلام الشربيني شاعر صوته طالع من الشارع، وكلمته صادقة، وده سر حضوره وتأثيره في شعر العامية المصري.
ومن كلماتة...
عام سعيد
على كل الحبايب
على كل الناس اللي مرت سنة.. وغابوا وهما أحباب
وعلى عُمر عدّى.. وهما لسه على البال
عام سعيد
على عيلتي وولادي.. ومراتي اللي شيلاني
وفي وقت الشدة.. كانت بجد سنداني
عام سعيد.. على إخواتي وعزوتي
وعلى اللي باخد "شورتهم" في وقت أزمتي
وعلى كل الناس اللي عرفتهم.. وبأخلاقهم كانوا شاريين
وفي وقت عوزة.. كانوا واقفين وساندين
عام سعيد
على كل كلمة كتبتها من القلب
وعلى كل كلمة سمعتها.. ومعدتش على الفاضي
عام سعيد
على كل الشعراء والأدباء اللي بحبهم
اللي عايشين.. واللي غابوا وسابوا كلامهم وظلهم
على سنة باللي فيها.. بأفراحها وأحزانها وغناويها
والسنة الجديدة..
تكون سنة سعيدة على كل الحبايب
تنسّيني تعب سنين.. كانت بزيادة فاكراني
هرمي كل حاجة حزينة ورا ظهري
وأفرح بالأيام اللي جاية.. وتضحك لي تاني