مبنى غريب... مبنى شكله مش شبه أي حاجة حواليه تماثيل حجرية باصة للسما تفاصيل معقدة و برج عالي كأنه بيراقب المكان كله
أيوه قصر البارون … ده أكتر قصر الناس بتخاف تقربله
بيقولوا إن القصر ده طول عمره محاط بالغموض مش مجرد قصر أثري وخلاص… لأ ده مكان الناس بتحكي عنه حكايات كتير لدرجة إنك مش عارف تصدق إيه وتكذب إيه
أول ما اسمه بيتقال دايمًا ييجي معاه كلام عن أصوات غريبة أنوار بتظهر وتختفي وحكايات عن ناس كانت عايشة جوه واختفت فجأة
القصة بدأت مع راجل اسمه البارون إمبان… راجل غني جدًا جه مصر من أكتر من ١٠٠ سنة و وقع في حبها لدرجة إنه قرر يبني لنفسه قصر يبقى مميز ومختلف عن أي حاجة و يقعد هنا في مصر في القصر بتاعه والراجل فعلاً عمل كده… بنى قصر شكله كأنه خارج من قصة خيالية
تصميمه غريب وتماثيله مريبة شوية تحس إنها بتبصلك مهما غيرت مكانك
المشكلة إن الغرابة دي كانت أول خطوة تخلي الناس تبدأ تتكلم
مع الوقت القصر اتقال إنه بقى مهجور… وساعتها بقى المسرح مفتوح لأي حكاية تتقال. ناس قالت إنها كانت ماشية بالليل وسمعت أصوات جوا القصر… أصوات تخبيط أو همسات خفيفة
و ناس تانية قالت إنها شافت نور بيطلع من الشبابيك رغم إن المكان كان فاضي تمامًا
والموضوع مكملش على كده… لا، الحكايات كبرت وبقى في كلام عن أحداث غريبة حصلت لعيلة البارون نفسها
في ناس قالت إن حد من عيلته حصل له حادث مأساوي جوا القصر
و نتيجة لكده النناس اعتبرت القصر مكان مليان أسرار محدش عرف حقيقتها الحكايات كانت بتتغير من شخص للتاني… لكن الحاجة الوحيدة اللي كانت ثابتة إن القصر بقى اسمه مرتبط بالرعب والغموض
بس لما تيجي تبص للموضوع بهدوء… هتكتشف إن أغلب الحكايات دي مفيش عليها دليل حقيقي القصر كان مهجور فترة طويلة.... وأي مكان مهجور طبيعي يبقى فيه أصوات بسبب الهوا أو الحيوانات الصغيرة أو حتى صدى الصوت نفسه
والأنوار اللي الناس كانت بتشوفها ممكن تكون مجرد انعكاسات نور الشارع أو العربيات
الغريب بقى… إن رغم إن الحقيقة غالبًا أبسط بكتير من الحكايات إحساس المكان نفسه مختلف لما تبص للقصر تحس إنه شايل ذكريات كتير شايل زمن كامل عدى عليه وسابه واقف لوحده التفاصيل الكتيرة في تصميمه والتماثيل اللي حواليه بتخلي خيالك يشتغل غصب عنك
يمكن القصر مش مسكون… بس أكيد مسكون في خيال الناس
واللي يخلي الموضوع أغرب إن كل واحد بيشوف القصر بيحكي عنه بطريقة مختلفة في ناس تشوفه تحفة معمارية نادرة
و ناس تشوفه مكان مخيف و ناس تشوفه مجرد شاهد على زمن خلص من زمان لكن محدش تقريبًا بيعدي من قدامه من غير ما يقف لحظة ويبصله… كأنه بيشدك تعرف حكايته حتى لو مش هتعرف الحقيقة كاملة
يمكن سر قصر البارون مش في إنه مكان مرعب… يمكن سره الحقيقي إنه مكان خلا الخيال يعيش أكتر من الواقع مكان بيفكرك إن أحيانًا الحكايات اللي بنحكيها بتبقى أقوى من الحقيقة نفسها.
لكن الحقيقة المطلقة عن القصر ده إنه مش بيت أشباح لكنه بيت أسرار… وأسراره لسه عايشة في خيال كل واحد وقف قدامه وبصله مرة واحدة بس
و لسة لحد دلوقتي لغز آل البارون مش معروف
فريق ضوء خافت
بقلم: جني محمد السمنودي