حوار صحفي مع الكاتبة/ ميادة خالد
س: في البداية، ممكن تعرفينا عن نفسك؟
ج : مياده خالد
23 سنه
من الدقهليه
خريجة معهد فوق متوسط
س: امتى بدأتي مشوارك الأدبي؟
ج : انا بحب الشعر من زمان ، وبحب احاول اكتبه ، في سنه 2020 كنت مرشحه كأفضل كاتبة شعر على مستوى الجمهوريه ، لكن المسابقه لم تكتمل بسبب جائحة كورونا
،ومن هنا كانت الانطلاقة الحقيقية بالنسبة لي
س: ايه السبب اللي خلاكي تحب الكتابة؟
ج : اكتر اسلوب بقدر اعبر بيه عن اي شعور واي وجهة نظر هو الاسلوب الكتابي
س: ايه هي أعمالك الأدبية؟
ج: ماهيا
كادر
هي حقيقه
مر
هذا ما إقترفه أبي
سيمفونية الليلة المظلمه
س: وهل شاركتي في معارض من قبل؟
ج: رواية مر كانت موجوده في معرض القاهره الدولي للكتاب 2021
رواية هذا ما إقترفه أبي كانت موجودة في معرض القاهره الدولي للكتاب 2022
رواية سيمفونية الليلة المظلمه كانت موجودة في معرض القاهره الدولي للكتاب 2024
وإن شاء الله رواية " وفاريوس " هتكون موجوده في معرض القاهره الدولي للكتاب 2026 وفي معارض اخرى كتير
س: مين اللي شجعك على الكتابة؟
ج : والدتي واختي في البدايه ، وزوجي من اول لحظه كان بيشجعني ، وتدريجيا بدأ كتير يأمنوا بيا ويشجعوني ،
س: ممكن تقوليلنا الكتابة أثرت فيكي ولا لأ؟ وايه مدى تأثيرها على شخصيتك؟
ج : تأثير الكتابه بيكون واضح جدا وقت ماأكون بكتب روايه او قصيده ، دايما بحاول اعيش مكان اشخاص الروايه ودا بيسبب ضغط رهيب جوايا وبيأثر عليا بالسلب للاسف
س: إيه هي نوعية الكتابات اللي بتكتبيها؟
ج :الروايات الورقيه الثلاثه اللي كانت متواجده في المعرض كان نوعهم " إجتماعي درامي "
رواية " وفاريوس " لون جديد بالنسبالي اول مره اكتب فيه " فانتازيا فضائيه " وفيها اسقاطات كتير اتمنى تعجبكم
بالنسبه لاسكريبتات وقصص السوشيال بحب اكون متنوعه ، يعني رعب ورومانسي واجتماعي
س: تحبي تقولي ايه لأي حد بيبدأ في الكتابة؟
ج : الشئ اللي لازم دايما نقوله لاي حد بيبدأ دايما انك أوعى تسمع للانتقادات الغير بنائه ، الانتقاد اللي بيحمل نصيحه تقبله ، اما غير كده فبلاش ، وظايما حاول تطور نفسك واسلوبك وهتوصل في يوم اكيد
س: مين هو قدوتك من الأدباء؟
ج : د/ أحمد خالد توفيق بحب كتاباته جدا
وكتير من الادباء المعاصرين بحترم كتابتهم
س: تحبي تقولي ايه للشخص اللي خلاكي تبدع في الكتابة؟
ج : اشكره طبعا انه كان سبب بعد ربنا اني اوصل للنقطه اللي انا واقفه عندها النهارده
س: وفي النهاية، تحب تقول ايه لقراءك؟
ج : أتمنى ان انا وكتاباتي نكون عند حسن ظنكم بينا ♥️
تحرير: أميرة حجازي