روفانا أيمن طه، بنت عندها 18 سنة من دمياط، من وهي في أولى إعدادي وهي شايلة حلم كبير جواها… كانت دايمًا شايفة نفسها فنانة تشكيلية مشهورة، وفعلاً ما ضيّعتش وقت. اشتغلت على نفسها، أخدت كورسات كتير، وشاركت في مسابقات رسم وفازت فيها بمراكز مهمة، وكمان شاركت في أكتر من عشر معارض وخدت شهادات تقدير ودروع بسبب تميزها.
وبسبب شغلها الراقي وإبداعها، تم اختيارها نائب رئيس المهرجان الدولي على مستوى العالم العربي والإسلامي في لجنة الفن التشكيلي، وده كان إنجاز ضخم ليها. كمان ظهرت في لقاءات تليفزيونية كتير في مدينة الإنتاج الإعلامي بالقاهرة، ومجلات وجرايد كبيرة كتبت عنها وأشادت بموهبتها.
بعد ما خلصت تالتة ثانوي كان نفسها تخش سوق العمل وتثبت نفسها، وفعلاً بدأت تشتغل مدربة رسم للأطفال في أكتر من مكان. كانت مميزة جدًا وقدرت تخلي أطفال كتير يحبّوا الرسم ويطوّروا موهبتهم، وكمان كانت بتعمل ورش رسم للأطفال للترفيه والإبداع.
ومع دخولها معهد راية، قررت تثبت نفسها أكتر في مجال الفن التشكيلي، وقدرت تحقق إنجاز مهم جدًا لما حصلت على المركز التاني على مستوى منطقة شرق الدلتا في الرسم. وروفانا دايمًا بتقول إن الفضل الكبير بعد ربنا بيرجع لوالديها اللي فضّلوا دايمًا يدعموها ويشجعوها.
أما عن حلمها… فروفانا بتحلم تؤسس أكاديمية خاصة لتعليم الرسم، وتعمل معرض كبير باسمها يكون مدعو فيه كبار الفنانين التشكيليين على مستوى العالم.
مسيرتها لسه في البداية… بس شكلها بداية فنانة كبيرة جاية في الطريق.
تحرير: مريم أشرف