حوار صحفي مع المذيع المتميز/مصطفى فتحي عيد
س: في بداية حوارنا، ممكن تعرفنا عن نفسك؟
- أنا أسمي مصطفي فتحي من مواليد القاهرة وخريج بكالوريوس نظم معلومات اداريه وحاليا متزوج وعايش في مدينة الإسكندرية مع زوجتي وابني وبعمل حاليا عمل خاص بجانب عملي في مجال التعليق الصوتي والإذاعة اون اير
س: ازاي بدأت مشوارك الاذاعي؟
- بدأت مشواري الاذاعي من خلال راديو حكاياتنا من خلال دعوة ودعم من الدكتورة اسماء مديرة الراديو وعملنا برامج كانت ناجحه جدا اللهم لك الحمد وبعد كده حاليا بعمل مع راديو الإذاعة اون أير
س: ممكن تقولنا أعمالك الاذاعية؟
- برامج راديو حكاياتنا كانت - خواطر حكاياتنا ثم برنامج في رمضان اللي فات كان اسمه روايه الائمه - ثم اخر برنامج علي راديو حكاياتنا كان اسمه القهوجي - ثم في راديو الإذاعة اون أير كان برنامج اسمه ما وراء الطبيعه وبعض الأعمال الدراميه والروائية هتعرض قريبا بإذن الله
س: لو قدامك فرصة تقدم برنامج اذاعي يفيد الشباب، ممكن يكون عن ايه؟
ده اللي بحاول احضره بس من خلال بودكاست مشترك مع دكتورة ومعلقه صوتيه كبيرة جدآ ماشاء الله وهيكون عمل جميل جدا وهيكون مفاجأة حلوة بإذن الله انتظروه في الوقت المناسب بإذن الله
س: لو في حد انتقدك بيكون ايه اول رد فعل؟
- ببتسم وبتقبل النقد جدآ مادام الهدف منه هو التحسين من الاسلوب والنص والتقديم لأننا في الاخر بنسعي كلنا لتقديم المحتوي اللي فعلا يكون مناسب لعقول المستعمين ويستفادوا منه ليه ولاسرهم
س: مين أول داعم ومشجع ليك، وتحب تقوله ايه؟
- اول داعم ليا هي زوجتي أمل أم أحمد أبني ربنا يحفظهم - وقفت جنبي وبتشجعني ولو تكاسلت زي الفترة الحاليه تقولي لأ وتشجعني أرجع أحسن من الأول بإذن الله - بعدها في الدكتورة اسماء مديرة راديو حكاياتنا - وفي الدكتور محمد المسؤول عن منصه وراديو آثر - وأستاذة مريم المشرفه علي صفحه معا للقمه - والأستاذة دعاء مديرة راديو الإذاعة اون أير
في النهاية بشكركم جدا علي اللقاء الجميل والمتميز جدا واللي بجد سعدت بيه جدا واتشرفت بيه جدا - وبإذن الله مزيدا من النجاحات لمعا للقمه ولمجله سبوت لايت
تحرير: أميرة حجازي