في سماء الفن والفنون، التقطت ريشتها وأبدعت لترسم أحلى العيون، منذ صغرها وهي تحب الرسم أبدعت ورسمت أجمل البورتريهات، إنها الفنانة التشكيلية ليلى الجبالي.
س: في البدايه ، ممكن تعرفينا علي نفسك؟ ج: انا ليلي الجبالي فنانة برسم بورتريهات ولوحات زيت ورصاص وألوان خشب واكريلك وألوان أويل باستيل وألوان مائية.
س : امتي بدأتي مشوار الرسم ؟
ج: الرسم بدأ معايا من وانا صغيرة كنت برسم أشخاص من خيالي في المدرسة زي روميو وجوليت يعني دايما كنت برسم شابة لابسة فستان ستايل قديم واسع ومنفوش وشاب لابس بدلة قديمة زي روميو كده من خيالي وساعات بنات ارسمهم لوحدهم لابسين فساتين قديمة واسعة ومنفوشة زي جوليت وساعات كنت ارسم الفساتين بتاعتهم عادية فالرسم كان موهبة عندي وكنت بحب ارسم في الفصل وقت الراحة بين الحصص .
س: ايه السبب اللي خلاكي تحبي الرسم ؟
ج: ان الرسم بيخلي الواحد يعيش في عالم تاني وهو بيرسم بيحس كأنه بيعيش مع اللوحة او البورترية اللي بيرسمه خصوصا لو من خياله البورتريه او اللوحة دي بتحسسه كأنه بيعيش في عالم من الخيال ولكن انها عشان احسن مستوي رسمي فرسمت بورتريهات كتير واقعية من صور واقعية عشان مستوي رسمي يتحسن و يطور واخدت كورسات رسم ولا زلت برده مستمره وبلاقي ان مستوي رسمي بيتحسن ويطور، وكمان الكورسات بيكون فيها أحيانًا حاجات جديده زي اني رسمت لوحات بالماركر الأسود استايل بلاك اند وايت وكانت جميلة أوي وكنت أول مره اعمل لوحات بالماركر الأسود .
س : هل شاركت في معارض للرسم من قبل؟
ج: شاركت في معرضين كانوا في نادي الجزيره الرياضي و معارض برا كتير زي معرضين بجاليري لمسات في وسط البلد و معرضينArt and colors 4 و 5 Art and colors في الدقي و ٣ معارض في قاعة اصداف بمصر الجديده .
س: مين اللي شجعت علي انك توصلي للي بقيتي فيه ؟
ج: الصراحه انا شجعت نفسي بشغفي في الرسم و الكورسات الاون لاين شجعتني برده وماما واختي شجعوني، لاني كنت باخد كورسات بره تكون مش بعيده عن المكان اللي انا فيه.
س: ايه الالوان اللي بتحبي تلوني بيها ؟
ج: الالوان اللي بحب ألون بيها يعتبر كل الألوان حسب البورتريه اللي برسمه بحب كل الألوان لكن الأحمر و البرتقالي والأصفر والأزرق والأخضر و لون البشره طبعا اللي بحبهم جدا في الرسم .
س : تحبي تقولي ايه للي لسه بيبدأ مشواره الفني و بيفقد الشغف احيانا ؟
ج: بقول انه لازم يكمل شغفه و ميقفش ويستمر علشان مستواه يتحسن في الرسم لان الاستمرارية بتحسن المستوي في الرسم بشكل كبير حتي لو حس ان الشغف وقف عنده وزهق شوية ممكن يوقف شوية مش مشكلة بس ميوقفش خالص يرجع يكمل لان كل ما يكمل ويستمر كل ما كان أفضل ليه في تحسين مستواه و المهم انه ميخليش حد يحبطه في أول المشوار او يحسسه انه مش هيكون لرسمه قيمة انا شايفة ثمار قيمته ممكن تيجي مع الوقت بالصبر و الكفاح وكمان من هنا ممكن تتباع اعماله كمان .
س : واخيرا ، مين اللي له الفضل في انك توصلي لحلمك ؟
ج: ماما لأنها شجعتني في أول معرض بشكل كبير بالنسبة للمشواير البعيدة بتاعت المعارض وانا علشان خليتها تشجعني برده بشكل كبير لاني قولتلها علي باقي المعارض لتحفيزي .
تحرير: أميرة حجازي