هل الأساطير ممكن تكون حقيقية؟ هل فعلا في بيوت ممكن تكون مسكونة؟
مقالنا انهارده عن مجزرة حصلت في بيت في أميركا.
سنة 1974، في بيت هادي في مدينة صغيرة اسمها أميتيڤيل في نيويورك، حصلت جريمة هزّت أميركا كلها.
اللي عمل الجريمة دي كان شاب اسمه رونالد ديفيو جونيور، عنده وقتها حوالي 23 سنة.
الليلة دي، وهو ماسك بندقية، دخل على أوضة أهله وإخوته وهما نايمين… وقتلهم كلهم بالرصاص.
الضحايا كانوا أبوه، أمه، وأربعة من إخواته. كله في لحظة، من غير ما حد يلحق حتى يقوم من السرير.
رونالد لما اتقبض عليه حاول يقول إنه "بيسمع أصوات" هي اللي كانت بتأمره يقتلهم. المحامين كمان حاولوا يثبتوا إنه مش عاقل وقت الجريمة. بس المحكمة ما اقتنعتش، وقالوا إنه مسؤول عن اللي عمله بالكامل.
اتحكم عليه بـ 6 مؤبدات، يعني عمره كله ورا القضبان.
لكن القصة ما انتهتش هنا…
بعد الجريمة بكم شهر، عيلة جديدة اسمها لوتز اشترت البيت. ومن أول يوم دخلوا فيه، بدأت الحاجات الغريبة:
أصوات مش معروف مصدرها.
ريحة كريهة بتظهر وتختفي.
أبواب بتتفتح وتقفل لوحدها.
ظلال بتظهر في البيت.
العيلة ما استحملتش غير 28 يوم بس، وبعدها هربوا من البيت سايبين كل حاجة وراهم.
الحكايات دي اتكتبت في كتاب مشهور اسمه The Amityville Horror، وبعدها اتعملت منه أفلام كتير.
ومن وقتها، البيت بقى أسطورة… ناس بتقول مسكون، وناس شايفة إن دي مجرد خدعة اتعملت عشان شهرة وفلوس. بس لحد النهارده، قصة مجزرة أميتيڤيل لسه واحدة من أبشع الجرائم اللي اتعملت جوه بيت عيلة، واللي خلت البيت ده رمز للرعب في العالم كله.
عمل فريق ضوء خافت
كتابة جنه اسماعيل
الصغيرة المبدعة 👏🏻👏🏻