استطاعت الكاتبة في سن صغير، أن تخط اسمها بين الكُتاب،
إنها الكاتبة شيماء أحمد سويلم
س: في البداية، ممكن تعرفينا عن نفسك؟
ﺟ: السلام عليكم ورحمة الله وبركاته، أنا شيماء أحمد سويلم، لقبي غسق، كاتبة مصرية من محافظة الجيزة، عندي17سنة
س: امتى بدأتي مشوارك الادبي؟
ﺟ: بدأت في أغسطس 2024، بس أنا بكتب من زمان
س: ايه السبب اللي خلاكي تحبي الكتابة؟
ﺟ: الكتابة دي فن ومزاج، جوايا حب اللغة، وغير كده دي الطريقة إللي بعبر بيها عن كل حاجة جوايا
س: هل شاركتي في معارض من قبل؟
ﺟ: لا بصراحة، ونفسي أشارك، بس مجتش فرصة، لو جت فرصة همسك فيها
س: مين اللي شجعك على إنك توصلي للي بقيتي فيه؟
ﺟ: أهلي، صحابي، كل ما كنت بحس نفسي هفقد الشغف كنت بلاقيهم جنبي
س: ايه هي اعمالك؟
ﺟ: معنديش أعمال فردية لسة، بس شاركت في كتاب خواطر مجمع اسمه "نبض الوقت" ونزل المعرض الماضي، وحاليًا في كتاب خواطر تاني مجمع برضو بس لسه بيجهز
س: تحبي تقولي ايه للي لسه بيبدأ مشواره الأدبي وبيفقد الشغف أحيانا؟
ﺟ: متستلمش، في صعوبات، بس الصعوبات دي هي اللي بتخلينا أقوى، حط في دماغك هدفك وأوصل، حارب، لازم تكون عندك عزيمة، متخليش أي حاجة توقفك
س: وأخيرا، مين اللي له الفضل في إنك توصلي لحلمك؟
ﺟ: أهلي لأني من غير دعمهم وتشجيعهم مكنتش هبقى كده، صحابي إللي كانوا جنبي وبيشجعوني بإستمرار، وطبعًا توفيق ربنا ده أهم حاجه
تحرير: أميرة حجازي
تحت إشراف: مريم أشرف