عندما تشعر بداخلك بمشاعر كثيرة ولا تعرف كيف تُخرجها،
فعليك أن تبحث بداخلك عن الموهبة التي تُفرغ مشاعرك فيها، اليوم حوارنا مع فنانة استطاعت بريشتها أن تفرغ هذه الطاقة وهذه المشاعر، عن طريق فنها المبدع، اخذت ريشتها وتألقت في فنها، انها الفنانة والرسامة(شيماء ماهر)
س: في البداية، ممكن تعرفينا عن نفسك؟
أنا شيماء، فنانة ورسامة، بحب أعبر عن مشاعري وأفكاري من خلال الرسم. الفن بالنسبة لي مش مجرد هواية، هو وسيلتي للتواصل مع العالم، وطريقتي في التعبير عن اللي جوايا بدون كلام.
س: إمتى بدأتي مشوار الرسم؟
بدأت أرسم من أيام المدرسة، وكانت حصة الرسم هي اللحظة اللي بستناها كل أسبوع. كنت دايمًا أحب أشخبط على أي ورقة تقابلني، وكان عندي شغف كبير برسم العيون.
في سنة 2022، رجعت للرسم من جديد، وكنت بحاول أقلد أي رسمة تعجبني. يمكن ما كانتش مثالية، لكن كنت بحاول، ومع الوقت بدأ رسمي يتحسن. وبدأت رحلتي الحقيقية لما قررت أطور من نفسي وأشارك رسمي مع الناس.
س: إيه السبب اللي خلاكي تحبي الرسم؟
الرسم خلاني أكتشف نفسي. هو المساحة اللي بحس فيها بالحرية، وبقدر من خلاله أعبر عن فرحي، حزني، وحتى لحظات الصمت اللي مش بعرف أوصفها بالكلام.
س: هل شاركتي في معارض للرسم من قبل؟
بصراحة، لسه ما شاركتش في معارض رسم. كل مشاركاتي كانت مع أهلي وأصدقائي، وعلى صفحتي الشخصية على فيسبوك، واللي كانت بداية جميلة لعرض شغلي.
س: مين اللي شجعك على إنك توصلي للي بقيتي فيه؟
أهلي كانوا دايمًا الداعم الأول، وبالأخص بنت أختي اللي كانت دايمًا تقول لي ارسمِي، وكانت بتدعمني بأدوات الرسم وتشجعني باستمرار.
كمان في صديقة اتعرفت عليها من خلال فيسبوك، ساعدتني كتير، وبشكرها من قلبي على دعمها وتشجيعها.
س: إيه الألوان اللي بتحبي تلوني بيها؟
رسمي كله بالرصاص من غير استخدام الألوان.
س: تحبي تقولي إيه للي لسه بيبدأ مشواره الفني وبيفقد الشغف أحيانًا؟
أقول له: طبيعي جدًا تحس بالإحباط أحيانًا، بس المهم إنك ما تستسلمش. الفن محتاج صبر، ومش كل يوم هيكون ملهم، لكن كل لحظة بترسم فيها بتقربك من حلمك، حتى لو خطوة صغيرة.
س: وأخيرًا، مين له الفضل في إنك توصلي لحلمك؟
الفضل بعد ربنا لكل شخص آمن بيا وشجعني، حتى لو بكلمة بسيطة. كل حد وقف جنبي أو قال لي كملي، كان سبب في إني أوصل للي أنا فيه النهاردة. شكراً ليكم من القلب.
وفي النهايه بحب اشكر حضرتك وكل القائمين على جروب معاً للقمه وعلى مجهودكم ومساعدتكم لكل المواهب من كل الفئات بتقدموا مجهود كبير جدا عشان تظهروا كل المواهب ربنا يوفقكم ويجازيكم خير وبالتوفيق دايما يا رب والجاي ان شاء الله مع معاً للقمه افضل واحسن وبالتوفيق للجميع
تحرير: أميرة حجازي
تحت إشراف: مريم أشرف